Usı jıldıń 25-mart kúni Ájiniyaz atındaǵı Nókis mámleketlik pedagogikalıq institutında professor-oqıtıwshılar hám student-jaslardıń qatnasıwında áhmiyetli temaǵa baǵıshlanǵan dógerek sáwbeti shólkemlestirildi. Bul ilaj Ózbekstan Respublikası Prezidentiniń 2025-jıl 24-fevraldaǵı PP-27-sanlı Pármanı hám PQ-75-sanlı qararınıń mazmun-mánisin keń jámiyetshilikke jetkeriw maqsetinde ótkerildi.
Ilajda Qaraqalpaqstan Respublikası statistika basqarması Investiciyalar hám qurılıs statistikası bólimi bas qánigesi D.Abdullaeva qatnasıp, kún tártibindegi máseleler boyınsha tolıq bayanat jasadı.
Bayanatta mámleketimiz basshısınıń usı hújjetlerinde belgilengen tiykarǵı wazıypalar hám baǵdarlarǵa ayrıqsha toqtap ótildi. Sonıń ishinde, Prezident janındaǵı Statistika agentligin Ózbekstan Respublikası Milliy statistika komiteti sıpatında qayta shólkemlestiriw arqalı tarawdı túp-tiykarınan reformalaw, statistika sistemasın xalıqaralıq standartlar tiykarında jetilistiriw hám makroekonomikalıq tarmaqlar kesiminde statistikalıq baqlawlardıń nátiyjeliligin arttırıw máseleleri keńnen sáwlelendirildi.
Sonday-aq, statistikalıq esabatlardı optimallastırıw, biznes subyektleri ushın esabat tapsırıw júgin azaytıw, "máhálleden - respublikaǵa shekem" principi tiykarında isenimli statistikalıq maǵlıwmatlar bazasın qáliplestiriw sıyaqlı áhmiyetli wazıypalar belgilep berilgeni atap ótildi.
Bayanatta 2025-jıldıń aqırına shekem "Aymaqlar statistikası" málimleme sistemasın iske qosıw rejelestirilip atırǵanı, kishi biznes subyektleri ushın jıllıq statistikalıq esabattı tapsırıw tártibi ápiwayılastırılıp atırǵanı ayrıqsha atap ótildi. Atap aytqanda, xızmetkerler sanı ortasha 5 adamnan az bolǵan hám jıllıq túsimi BEMniń 2000 esesine shekemgi bolǵan mikrofirma hám kishi kárxanalar ushın jıllıq esabat tapsırıw minnetlemesi biykar etilip, hár úsh jılda bir márte tapsırıw tártibi engiziliwi belgilengen.
Bunnan tısqarı, statistika sistemasına zamanagóy sanlı texnologiyalardı keńnen engiziw máseleleri de dodalandı. Atap aytqanda, 2026-jıl 1-yanvardan baslap jasalma intellekt tiykarında isleytuǵın "Maslahatchi" interaktiv xızmeti arqalı kárxana hám shólkemlerge esabat tapsırıwda ámeliy járdem kórsetiliwi, "Tahlilchi" xızmeti arqalı paydalanıwshılarǵa zárúr statistikalıq maǵlıwmatlardı jedel izlew imkaniyatı jaratılıwı hám "Call-oray" arqalı telefon arqalı statistikalıq baqlawlar ótkeriw sisteması jolǵa qoyılıwı rejelestirilip atırǵanı málim etildi.
Sonıń menen birge, 2025/2026-oqıw jılınan baslap Tashkent mámleketlik ekonomika universitetiniń Ekonomikalıq statistika kafedrası filialınıń Milliy statistika komiteti sistemasında shólkemlestiriliwi bilimlendiriw hám ámeliyat integraciyasın bekkemlewge xızmet etetuǵını atap ótildi.
Ilaj dawamında PQ-75-sanlı qararına muwapıq Milliy statistika komiteti quramında "Milliy statistika sistemasın transformaciyalaw" ofisi shólkemlestirilgeni, bul ofis statistikalıq maǵlıwmatlardıń sapasın arttırıw, xalıqtıń dáramatların bahalaw metodologiyasın jetilistiriw, mikro dárejedegi baqlawlardı keńeytiw hám paydalanıwshılar menen nátiyjeli qarım-qatnas sistemasın jolǵa qoyıwda áhmiyetli rol atqaratuǵını ayrıqsha atap ótildi.
Dógerek sáwbeti juwmaǵında qatnasıwshılar ózlerin qızıqtırǵan sorawlarǵa tolıq juwaplar aldı hám bul reformalardıń áhmiyeti boyınsha pikir alıstı.
